कॅम्पबेल विल्सन हे एअर इंडियाचे नवीन मॅनेजिंग डायरेक्टर आणि सीईओ असणार आहेत. कॅम्पबेल हे सिंगापूर एअरलाईन्सच्या स्कुट एअरचे सीईओ होते. सिंगापूर एअरलाईन आणि टाटा समूह ह्यांचं जॉईंट व्हेंचर म्हणजे विस्तारा एअरवेज. थोडक्यात टाटा समूहाच्या कार्यशैलीबद्दल माहिती असणारा आणि एअरलाईन बिझनेस बद्दल सखोल माहिती असणारा माणूस हा एअर इंडियाला उंच आकाशात उडण्यास मदत करणार आहे.

एअर इंडिया ही अनेक दशकं ही सरकारी कंपनी होती त्यामुळे सरकारी खाक्या हा तिच्या कणाकणात भिनला आहे अशा कंपनीला त्या वातावरणातून बाहेर काढून तिला जागतिक स्पर्धेत उतरवणं हे खूप मोठं चॅलेंज कॅम्पबेल विल्सन ह्यांच्या समोर आहे.

२७ जानेवारी २०२२ रोजी टाटांनी एअर इंडियाची मालकी विकत घेतल्याची घोषणा केली. कुठल्याही कंपनीकडे जगभरातले फायद्याचे एअर रूट्स असणं फार महत्वाचं असतं त्या बाबतीत एअर इंडिया ही अत्यंत प्रभावी कंपनी आहे. जगातल्या अनेक महत्वाच्या शहरांच्या दिशेने एअर इंडियाची विमानं झेपावतात. त्या ठिकाणी एअर इंडियाची जमेची बाजू आहे पण त्याच वेळेस जुनी झालेली विमानं, जुन्या मानसिकतेत अडकलेला स्टाफ आणि त्याहून महत्वाचं म्हणजे कर्जाचा डोंगर ह्या कात्रीत एअर इंडिया अडकली आहे. एअर इंडिया नफ्यात येणं हे देशाच्या एकूणच हवाई वाहतूक क्षेत्रासाठी गरजेचं आहे. त्यामुळे इतक्या मोठ्या जबाबदारीसाठी कॅम्पबेल विल्सन ह्यांना ‘मनीन्यूज१’ च्या शुभेच्छा !